Marrja e shtetësisë shqiptare

Marrja dhe lënia e shtetësisë shqiptare rregullohet me ligjin për shtetësinë. Autoriteti përgjegjës për trajtimin e çështjeve të shtetësisë është Ministria e Brendshme. Marrja dhe lënia e shtetësisë bëhet nga Presidenti, me dekret. Dekreti hyn në fuqi menjëherë dhe më pas botohet dhe në Fletoren Zyrtare. Marrja e shtetësisë bëhet kur të huajt që dëshirojnë të bëhen shtetas shqiptarë plotësojnë kushtet që cakton ligji përkatës.Republika e Shqipërisë lejon dyshtetësinë dhe për marrjen e shtetësisë shqiptare të huajt nuk janë të detyruar të lënë shtetësinë/shtetësitë e vendeve nga vijnë.

Fëmijtë e lindur nga prindër shqiptarë marrin automatikisht shtetësinë shqiptare. Kur prindërit e fëmijëve jetojnë jashtë shtetit, janë të nevojshme kryerja e veprimeve të rregjistrimit për të përfituar dokumentet e shtetasit, si çertifikatat e lindjes, pasaportat, etj.

Njohja ose marrja e shtetësisë shqiptare

Në mbështetje të nenit 102 pika 4 e Kushtetutës; të nenit 7, nenit 25 të ligjit nr. 8389, datë 05.08.1998 "Për shtetësinë shqiptare", të ndryshuar; dhe  Vendimit nr. 554, datë 03.07.2013, të Këshillit të Ministrave, "Për përcaktimin e procedurave për njohjen ose fitimin e shtetësisë shqiptare nga personat me origjinë shqiptare, me përjashtim të shtetasve të Republikës së  Kosovës", Ministri i Punëve të Jashtme dhe Ministri i Brendshëm, në bashkërendim midis tyre, kanë publikuar një udhëzim të përbashkët lidhur me plotësimin e dokumentacionit për gjithë personat e interesuar.Sqarojmë se kërkesa për shtetësinë shqiptare paraqitet pranë Ministrisë së Brendshme/Komisariateve vendore të Policisë së Shtetit, të vendqendrimit të personit ose, në rast se personi banon jashtë shtetit, pranë përfaqësive diplomatike ose konsullore të Republikës së Shqipërisë jashtë shtetit ose në përfaqësi në vendin ku i interesuari banon apo ndodhet fizikisht.