Kryetari i Kuvendit i Shqipërisë z. Ilir Meta priti në një takim të veçantë Kryetarin e Dhomës së Përfaqësuesve të Japonisë, Shkëlqesinë e Tij, z. Bunmei Ibuki.

Gjatë takimit, z. Meta vlerësoi marrëdhëniet shumë të mira midis Shqipërisë dhe Japonisë dhe shprehu bindjen se ato duhen forcuar më tej, si në aspektin politik dhe atë ekonomik.

Në këtë kuadër, z. Meta shprehu vullnetin e Shqipërisë për të mirëpritur një rritje të investimeve Japoneze jo vetëm në vendin tonë, por përmes Shqipërisë në të gjithë rajonin tonë.

Ndërkaq, Kryetari i Kuvendit z. Meta falënderoi homologun e tij Ibuki për mbështetjen që Japonia ka dhënë për njohjen e shtetit të Kosovës.

Kryetari i Dhomës së Përfaqësuesve të Japonisë, z. Bunmei Ibuki vlerësoi procesin e paqtë demokratik të Shqipërisë dhe reformat e arritura gjatë kësaj periudhe në politikë dhe legjislativ.

Gjithashtu z. Ibuki u shpreh se roli i shqiptarëve jo vetëm në Shqipëri, por edhe në vendet e tjera është shumë i rëndësishëm për të sjellë paqe dhe stabilitet në rajon.