Ambasadori Pëllumb Qazimi, në datat 22 dhe 23 shtator ishte pjesëmarrës në dy veprimtari kushtuar 50 vjetorit të Organizatës Ndërkombëtare të Frankofonisë. Në ngjarjen e datës 23 shtator të pranishmit i përshëndeti Ministri i Jashtëm i Sllovenisë Anže Logar. Po ashtu, pjesëmarrësit u përshëndetën edhe nga ambasadorët e Francës dhe Zvicrës, në cilësinë e organzatorëve.

Në datën 14 shtator, ambasadori Pëllumb Qazimi ka pritur në takim prezantues ambasadorin e ri të Gjermanisë në Slloveni, Adrian Pollmann. Gjatë takimit janë shkëmbyer mendime e vlerësime për tema të ndryshme duke veçuar proçesin e integrimit evropian të Shqipërisë dhe fillimin e negociatave të anëtarësimit, ndërkohë që Gjermania ka presidencën e Këshillit të BE-së. Bashkëbiseduesit kanë trajtuar gjithashtu marrëdhëniet dypalëshe Shqipëri-Gjermani, zhvillimet në vendet e Ballkanit Perëndimor dhe perspektiva e tyre euroatlantike, etj.

Në datën 12 shtator, me ftesë të Ministrit të Punëve të Jashtme Anže Logar, u organizua eskursion me drejtuesit e misioneve diplomatike, akredituar në Republikën e Sllovenisë. Kësaj radhe pjesëmarrësit u njohën më nga afër me vlerat historike, kulturore, por edhe të biznesit në zonën e Vipavës. Vendet e vizituara ishin Štanjel, Vipavški Križ dhe Ajdovčina. Pjesëmarrësit u pritën dhe u përshëndetën nga ministri Logar, i cili qëndroi me pjesëmarrësit gjatë gjithë veprimtarisë. Në këtë ngjarje ishte i pranishëm edhe ambasadori Pëllumb Qazimi me bashkëshorten.

Në pasditen e datës 10 shtator, në Shtëpinë e Evropës në Lubjanë, nën drejtimin e Adrian Pollmann, ambasador i Gjermanisë në Slloveni dhe Zoran Stančič, drejtues i Përfaqësimit të Komisionit Evropian në Slloveni, u zhvillua veprimtaria "Përshtypje nga Evropa: Prezantimi i Gjermanisë". Mbrëmja iu kushtua 250 vjetorit të lindjes të kompozitorit Ludwig van Beethoven.