Në datën 3 nëntor, ambasadori Pëllumb Qazimi ka pritur në Ambasadë shqiptaren Selda Sukaj Kocinaj nga Durrësi me banim në Celje të Sllovenisë. Ajo është e punësuar si moderatore ndërkulturore në Universitetin Popullor në Celje dhe është bashkëautore e fjalorit sllovenisht-shqip për fëmijë. Selda është e përfshirë dhe e angazhuar në projekte të aktivizimit social të grave shqiptare, financuar nga Ministria e Punës të Sllovenisë dhe nga Bashkimi Evropian.

Me ftesë të kryeministrit të Sllovenisë, Janez Janša, kryeministri i Shqipërisë, Edi Rama, zhvilloi një vizitë pune në Slloveni. Ai u takua me homologun slloven në Bled për të diskutuar mbi Planin e Madh të Investimeve të BE në Ballkanin Perëndimor, ecurinë e procesit të integrimin europian në Shqipëri e në rajon, gjendjen politike dhe ekonomike të vendeve të rajonit, në kontekstin e përgatitjeve mbresëlënëse të Sllovenisë për mandatin e Presidencës së Bashkimit Europian vitin e ardhshëm. 

Në datën 19 tetor, gazeta Delo ka botuar intervistën e Zef Mazit, Kryenegociator i negociatave për anëtarësimin e Shqipërisë në BE. Mazi thekson se e ardhmja është një hapësirë e përbashkët evropiane, duke përfshirë Ballkanin Perëndimor. Gazeta nënvizon se Kryenegociatori shqiptar Mazi është një nga diplomatët që besojnë në zgjerimin e BE-së dhe idenë evropiane. Sipas tij, Shqipëria, që është kandidate zyrtare për anëtarësim në BE prej vitesh, ashtu si edhe Sllovenia, do të ketë shumë përfitime pas anëtarësimit të plotë në Bashkimin Evropian.

Në datën 13 tetor, ambasadori Pëllumb Qazimi u prit në takim nga Igor Zorčič, President i Asamblesë Kombëtare të Sllovenisë. Ambasadori Qazimi përcolli përshëndetjet e Kryetarit të Kuvendit të Shqipërisë, prezantoi progresin e Shqipërisë sipas fushave për të filluar bisedimet e anëtarësimit në BE, si dhe shprehu falënderime për mbështetjen e vazhdueshme të Sllovenisë në rrugëtimin evropian të Shqipërisë.